Ğabdulla Tuqayğa bağışlanğan internet portal

Ğabdulla Tuqayğa bağışlanğan internet portal
Ğabdulla Tuqayğa bağışlanğan internet portal
Tatarstannıñ xalık artistı, tatar opera sängatenä nigez saluçılarnıñ berse Usman Älmiev vafat buldı.

Usman Älmiev 1915 elnıñ 24 aprelendä Yaşel Üzän rayonınıñ Akeget avılında tugan. Ul P.Çaykovskiy isemendäge Mäskäü däülät konservatoriyaseneñ Tatar opera studiyasendä belem ala. Icadi yulı 1939 elda başlangan cırçı xalıknıñ yaratkan artistına äverelä.

Ul tatar säxnäsenä yaña başkaru manerası kertä. Tamaşaçı belän dustanä mönäsäbät buldıra, säxnädä üz-üzen totışı belän dä küplärdän aerılıp tora. Cırçı tavış, mimika, plastika belän osta faydalana belä. Şuña da, anıñ konsertları härçak tulı zallarda uza torgan bula. Xalık aldında çıgış yasaganda Älmiev tulı ber teatr tudıra algan. Mondıy kürkäm küreneşne barı tik çın talant iyaläre genä başkara ala.

Usman Älmiev tatar estrada sängatendä yaktı ez kaldırdı. Opera säxnäsendä dä anı bäxetle yazmış ozata yörde. Tatar operalarında ul härvakıt töp rollärne genä başkardı. «Başmagım» da Galimcan, «Galiyabanu»da Bädri häm Xälil, «Altınçäç» tä Cikmärgän, Urmay partiyalären zur ostalık belän başkara. Häm älege obrazlar xalık küñelendä bügen dä yaşi.

Usman aga Tatarstan Teatr ähelläre berlegeneñ veterannar sovetında da 30 el xezmät itte, 20 el anıñ räise bulıp tordı. Ul Tatarstannıñ teatr sängatenä üz-üzen ayamıyça zur köç kertte. TR Teatr ähelläre berlege Usman abıynıñ yakınnarı, tugannarı häm anıñ icatın xörmät itüçelärneñ tirän kaygısın urtaklaşa.
Related Posts Plugin for WordPress, Blogger...