Bolgar taş sıypıy torgan urın tügel...

Berniçä distä el elek kenä Bolgarga, Rossiya möselmannarı üzäk Diniya näzaräte räise möftiy Tälgat Tacetdin äytkänçä, kaçıp-posıp kına cıelalar ide. Xäzer isä elga ber tapkır bulsa da tatar möselmannarı öçen biregä kilep kitü üze zur izge gamäl kıluga äylänep bara. Ä babalarıbıznıñ Islam dinen kabul itülären bilgeläp ütü räsmi tösmer aldı. 18 iyundä 20 nçe tapkır uzdırılgan Izge Bolgar cıenı Rossiyaneñ törle töbäklärendä yaşäüçe meñärlägän millättäşlärebezne cıydı. Başka ellardan aermalı bularak, bıel alarga aldanrak kilü mömkinlege dä çıktı. Berdän, 15 endä başlanıp, Izge Bolgar cıenında katnaşu belän tämamlangan din ähelläreneñ ikençe forumı moñar säbäpçe buldı. Belgänebezçä, älege çarada 900 gä yakın millättäşebez katnaştı. Ikençedän, Bolgarda palatkalar alanlıgı açılu östämä şartlar tudırdı. 17 iyun kiçendä erak töbäklärdän kilgän yözläp kunak palatkalarda tön kungan. Bolgar taş sıypıy torgan urın tügel...