12 iyun könne Kanadanıñ Toronto şähärendä Sabantuy uzdırıldı. Ul Torontodagı «Berlek» tatarlar oeşması tarafınnan oeştırılgan ide. Millättäşlärebez bu könne şähärneñ iñ kürkäm parklarınnan berse G. Ross Lord parkına cıeldılar.
Tabigat xalıknı açık havada yal itü öçen menä digän hava torışı belän söenderde: koyaş ta ul kadär katı kızdırmadı, bolıtlar da kük yözendä tınıç kına yözdelär.
Sabantuyda 150 gä yakın keşe katnaştı. Bäyräm programması kızıklı häm mavıktırgıç buluı belän aerılıp tordı. Oeştıruçılar anı tatar milli goref-gadätlären, tradisiyalären tulısınça çagıldırırlık itep eşlärgä tırışkannar. Iñ töp maksat — tugan cirlärennän çittä yaşäüçe millättäşlärebezne berniçä sägatkä bulsa da tatar moxite belän çolgap alu, alarnıñ küñellärendä tugan telgä, millätebezgä karata mäxäbbätne tagın da üsterü ide. Kanadada Sabantuy uzdırıldı
