Intertat redaksiyase baş möxärrire, gabdullatukay.ru portalı citäkçese Älfiya Yunısova Arça rayonı Başkarma komitetı citäkçese urınbasarı Nadiya Miftaxetdinovaga Räxmät xatı tapşıra
ALDAGI1 of 10 KILÄSE
Tatarstannıñ Arça rayonında tatar şagıyre Gabdulla Tukaynıñ tormış häm icat yulına bagışlangan www.gabdullatukay.ru Internet–portalın täkdim itü kiçäse uzdı.
Rayon üzägendä urnaşkan Sängat mäktäbe bu könne bäyrämçä görläp tordı: mäktäp ukuçıları biredä G.Tukay äsärläre buença şigri–muzıkal kompozisiya kuydı. Işektän ük kunaklarnı Tukay äkiyatläre geroyları – Käcä belän Sarık, Su anası belän Şüräle karşı alsa, balalar tınlı orkestrı “Tukay marşı”n uynap, böten binanı yañgıratıp tordı. Foyeda balalar Tukay äsärlärenä yasagan illyustrasiyalär kürgäzmäse oeştırılgan ide.
Gabdulla Tukay tuuına 125 el tulu uñaennan açılgan www.gabdullatukay.ru saytı belän yakınnan tanıştırunı şagıyrneñ yubiley könnäre yakınlaşkanda iñ berençe bulıp Arça töbägendä ütkärü oçraklı xäl tügel. Arçalılar üzläre härvakıt belderep torgança, “Arça – Tukay yagı ul” häm biredä Tukay ezlären saklauga zur igtibar birälär. Tukaynıñ iñ matur muzeyları Arça rayonında urnaşuın iskä alu da citä. G.Tukay saytına mäglümat tuplau barışında Arça rayonı xakimiyate citäkçelege härvakıt teläktäşlektä buldı, xakimiyat başlıgı Almas Näzirov iñ baştan uk Tukay saytında şagıyrneñ tugan yagı turında mäglümat urnaştırılunıñ ähämiyaten assızıklagan ide.
Sängat mäktäbendä uzgan kiçädä rayon xakimiyate citäkçelege isemennän Başkarma komitet räise urınbasarı Nadiya Miftaxetdinova oçraşuga kilgän G.Tukay saytı icat törkemen häm rayonnıñ mäktäp ukuçıların, ukuçılarnı, kitapxanäçelärne Almas Näzirov isemennän sälamläp, Arça yagınıñ Tukay icatına yogıntısı turında söyläde, Tukay saytın mäglümat belän tulılandıru eşendä alga taba da rayon zıyalıların aktiv katnaşırga çakırdı.
Arçanıñ 2 nçe urta gomumi belem birü mäktäbe yugarı kategoriyale tatar tele häm ädäbiyatı ukıtuçısı Gölzidä Yosıpova äytkänçä, näk menä Nadiya Miftaxetdinova ukıtuçılarga şagıyrneñ icatın Arça mäktäplärendä öyränü täcribäsen urtaklaşıp, G.Tukay saytına üzläreneñ däres eşkärtmäläre, fänni–ezlänü materialları, ädäbi kiçä ssenariyların cibärergä öndägän. Iñ aktiv mögallimnärgä bu oçraşuda “Intertat.ru” Tatarstan elektron gazetı baş möxärrire, www.gabdullatukay.ru saytı proektı jitäkçese Älfiya Yunısova Räxmät xatları tapşırdı. Alar – Gölzidä Yosıpova, Öçile urta mäktäbe tatar tele häm ädäbiyatı ukıtuçısı Tatarstannıñ atkazangan ukıtuçısı Färxät Zıyatov, Iske Çürile urta mäktäbe I kategoriyale tatar tele häm ädäbiyatı ukıtuçısı Läysän Välieva. G.Tukay saytına mäglümat tuplauda yardäm kürsätkännäre öçen Älfiya Yunısova şulay uk Arça munisipal rayonı xakimiyate başlıgı Almas Näzirov, rayon Başkarma komitetı citäkçeseneñ sosial mäsälälär buença urınbasarı Nadiya Miftaxetdinova häm Mädäniyat idaräse citäkçese Ilnur Kotdusovka da Räxmät xatları yulladı.
Älfiya Yunısova üz çıgışında arçalılarga Gabdulla Tukay portalın oeştıru ideyase, anıñ östendä eş barışı, saytnıñ üzençälekläre turında söyläde. “Tatarstan Däülät Sovetınıñ Mädäniyat, mägarif, fän häm milli mäsälälär komitetı teläktäşlegendä, “Intertat.ru” redaksiyase nigezendä, G.Tukaynıñ 125 ellıgı uñaennan şagıyrgä bagışlangan räsmi Internet–portal oeştıru proektı 2009 eldan tormışka aşırıla başladı. Internetta www.gabdullatukay.ru adresı buença eşläüçe saytta Tukaynıñ barlık äsärläre urnaştırıldı. Sayttagı säxifälärdä Tukaynıñ zamandaşları, Tukaynıñ muzeyları turında mäglümatlar, G.Tukay isemendäge Tatarstan Däülät premiyase laureatları turında beleşmälär, tatar şagıyre turında kürenekle şäxeslärneñ fikerläre tuplandı. “Tukay fäne” säxifäsendä Gabdulla Tukaynıñ tormış yulın häm icatın öyränep yazılgan fänni xezmätlär tuplana”, – dip söyläde Älfiya Yunısova häm Tukay saytınıñ tatar telendä genä tügel, tatarça latin xärefläre belän yazılgan versiyase, şulay uk rus häm ingliz telle bitläre dä barlıgın assızıkladı. Tukay yaşägän häm säyaxät itkän urınnar turında saytka mäglümat tuplau maksatında şagıyrneñ yaşüsmer elları uzgan Uralsk töbägenä, şulay uk Sankt–Peterburg, Ästerxan, Troisk şähärlärenä baru häm andagı tatarlar belän oçraşıp aralaşular, Tukay “ezlären” fotoga töşerülär turında, älege fotolar şulay uk saytnıñ “Fotogalereya” bitendä täkdim itelüen äytte. “Gabdulla Tukay saytına materiallarnı kitapxanälärdän, berençe çiratta Tatarstan Milli kitapxanäse fondlarınnan, muzeylardan, näşriyatlardan, sängat berleklärennän tuplıybız. Äle urnaştırası mäglümatlar da şaktıy. Şagıyr belän bäyle materiallarnı barlap, ber mäydanga cıyu küp köç häm vakıt taläp itä torgan eş, Tukaynıñ küpyaklı talantlı şäxes buluın häm anıñ tatar xalkına zur yogıntısın isäpkä alganda, bu eşneñ oçı–kırıe kürenmäven añlarga mömkin”, – dide Älfiya Yunısova.
G.Tukay saytına bagışlangan kiçä çın mägnäsendä Tukay ruxı belän sugarılgan ide. Säxnädä Arçanıñ 1 nçe urta mäktäbe folklor kollektivı, 5 nçe gimnaziya ukuçıları Tukay şigırlären söyläde, Tukay şigırlärenä yazılgan cırlarnı başkardı. Tanılgan garmunçı Rädis Xarisov belän bayançı Vagıyz Ähliullinnıñ tatar xalık köylärenä tezmäse Tukaynıñ “Milli moñnar” şigırennän soñ aeruça ahäñle yañgıradı. Mäktäp ukuçıları arasında G.Tukay icatına bagışlangan fänni–ezlänü xezmätläre bäygesendä ciñüçelär isä bu könne üzläreneñ icadi eşläre belän tanıştırdı.
G.Tukay saytın täkdim itü çarası şagıyrne iskä alu könendä – 15 apreldä 14.00 sägattä Kazandagı G.Tukay Ädäbi muzeenda da uzaçak.
