Uzgan elnıñ 6 iyunendä Kazan uramnarınıñ bersendä ükeneçle yul hälakäte bula. Aviatözeleş rayonı sudı sudyası Eduard Soldatov üzeneñ maşinasında barganda, 23 yaşlek Marat Gaynetdinovnı bärderä. Kızganıçka, eget törle tän cäräxätlärennän şunda uk hälak bula. Medisina tikşerüe kürsätkänçä, ul könne Eduard Soldatov iserek xäldä rul artına utırgan.
Märxümneñ ätise Irek Gaynetdinov faciga bulgan könne äle dä xäterli. 6 iyun könne 23:40 sägattä ir-atnıñ kesä telefonına ulınıñ dustı şaltıratıp, Maratnıñ ülüe xakında xäbär itä. «Min şunduk uramga çıgıp, faciga urınına yögerdem, - dip iskä ala Irek Gaynetdinov. - Marat tramvay yulında yata ide, kul-ayakları sıngan ide. Berniçä metr eraklıkta kara töstäge çit il maşinasın kürdem. Maşinada ulımnı bärdergän keşe utıra ide».
«Ul keşeneñ maşinasına şaktıy zıyan kilgän, kapotı yarıysı gına izelgän, aldagı täräzäse vatılgan ide. Üz-üzen totışı buença min ul keşeneñ bik nık iserek buluın añladım. Anıñ yöze kızıl, başı haman yak-yagına çaykala, citmäsä nider söylänä. Min anıñ belän söyläşergä dip yanına barırga telädem, ämma mine YuXIDI xezmätkärläre yakın da kitermäde», - dide Maratnıñ ätise.
Kazannıñ Keşe xokukların yaklau üzäge yardäme belän Irek Gaynetdinov sudyaga karşı cinayat eşen kuzgatunı sorap, Tikşerü komitetına gariza tapşıra. Tikşerüçe fikerençä, Eduard Soldatov tizlekne arttıru arkasında maşina belän idarä itä almagan. 15 iyundä Maratnıñ tugannarı häm dusları respublikanıñ Sud departamentı idaräse karşında piket oeştıra. Piketçılar yanına vedomstvo citäkçese Cäüdät Säläxov çıgıp, keşe bärdergän sudyanıñ eş-gamällären añlata. Soñrak Tatarstan sudyaları kollegiyase utırışında Eduard Soldatovnı eşennän azat itälär.
Xokuk yaklauçılar üzägeneñ matbugat xezmäte Intertat xäbärçesenä beldergänçä, 14 martta Rossiya Tikşerü komitetı räise Aleksandr Bastrıkin Soldatovka karata cinayat eşe kuzgatkan. Ul Rossiya Cinayat Kodeksınıñ 264nçe maddäsendäge 4nçe bülege nigezendä kuzgatılgan. Xäzer Eduard Soldatovka 7 elga kadär iregennän mäxrüm itü yanıy.
